एसिया कप फाइनलमा आज भारत र श्रीलंका भिड्दै

एसिया कप क्रिकेटको फाइनल भिडन्त आज भारत र श्रीलंकाबीच हुँदैछ । तर, वर्षातको भविष्यवाणी गरिएको हुँदा आजै नतिजा आउँछ भन्ने निश्चित छैन ।

आयोजक राष्ट्र पाकिस्तान भए पनि एसिया कपका धेरै खेलहरू श्रीलंकामा भइरहेका छन् । र, अधिकांश खेलमा वर्षाले दु:ख दिएको छ । आज पनि पानी पर्ने यथेष्ट सम्भावना रहेको प्रक्षेपण मौसम पूर्वानुमान गर्ने निकायहरूले गरेका छन् । यदि वर्षाको अवरोधले आज नतिजा नआएको खण्डमा भोलि ‘रिजर्भ डे’ राखिएको छ । तर, मौसमी प्रक्षेपणअनुसार भोलि पनि पानी पर्ने सम्भावनालाई नकार्न सकिन्न ।

यदि आज एउटा टिमले ब्याटिङ गरेर दोस्रो टिमले पनि कम्तिमा २० ओभर ब्याटिङ गर्न भ्यायो भने डीएल मेथडको आधारमा विजेता घोषित गरिने छ । तर, दोस्रो इनिङमा २० ओभरको खेल हुन नसकेको खण्डमा आज जुन स्थितिमा खेल रोकिएको छ, त्यही स्थितिबाट भोलि खेल सुचारु हुन्छ । र, भोलि दोस्रो इनिङको कम्तिमा २० ओभरको खेल सम्भव भएमा डीएल मेथडबाट नतिजा घोषणा हुन्छ ।

यदि आज र भोलि दुवै दिनको खेल वर्षाले बिथोलेर नतिजा निकाल्न सकिएन भने भारत र श्रीलंका दुवै टीमलाई संयुक्त विजेता घोषणा गने छ । मौसम पूर्वानुमानका अनुसार आज कोलम्बोस्थित आर प्रेमदासा रंगशाला क्षेत्रमा पानी पर्ने सम्भावना ९० प्रतिशतसम्म छ । यसलाई टुक्र्याएर विश्लेषण गर्दा वर्षातको सम्भावना बिहान साढे ९ बजे–५० प्रतिशत, मध्यान्न १२ः३० बजे–५० प्रतिशत, दिउँसो ३ः३० बजे–६० प्रतिशत, राति ९ः३० बजे ६० प्रतिशत रहेको छ । साथै, बेलुकी हावाहुरीको सम्भावना पनि रहेको जनाइएको छ । एसिया कपको सुपर ४ का सबै खेलहरू वर्षात्ले प्रभावित बनेका थिए ।

यसअघि सन् २००२ को एसिया कप फाइनल वर्षाले बिथोलेको थियो । रिजर्भ डेमा पनि पानी परेर नतिजा आउन नसकेपछि त्यसबेला पनि भारत र श्रीलंका संयुक्त विजेता बनेका थिए ।