नागरिकको स्वतन्त्रता र हितबाहेक राज्यको कुनै स्वार्थ हुँदैन : राष्ट्रपति पौडेल

काठमाडौं । राष्ट्रपति रामचन्द्र पौडेलले नागरिक स्वतन्त्रता र हितबाहेक राज्यको अरु कुनै स्वार्थ नहुने बताएका छन् ।

नव वर्ष २०८३ को शुभकामना सन्देश दिँदै उनले लक्ष्य प्राप्त गर्न संकल्प र साधना चाहिने बताएका हुन् । उनले नेपालमा प्रचलनमा रहेका संवत्‌हरू हाम्रो इतिहास, सभ्यता र जीवनका महत्त्वपूर्ण हिस्सा रहेको बताए ।

“हाम्रो देशमा प्रचलनमा रहेका संवत्‌हरू हाम्रो इतिहास, सभ्यता र जीवनका महत्त्वपूर्ण हिस्सा हुन् । जसले हाम्रो सभ्यता, सामाजिक जीवन र परम्पराहरूको प्रतिनिधित्व गर्दै नेपालको गौरवमय विगतलाई सम्झाउँछन् र उन्नत भविष्यतिर अगाडि बढ्न प्रेरित गर्दछन् । हामी नेपालीहरूले नव वर्षलाई विशेष दिन मानी विगतको समीक्षा गर्ने तथा आगामी दिनमा गरिने कार्यहरूका लागि प्रतिज्ञा र संकल्प गर्ने शुभसाइतका रुपमा लिँदै आएका छौं । विशेष पर्व र दिनहरूमा जीवनका लक्ष्यहरू निर्धारण गर्ने र त्यसलाई पूरा गर्न संकल्पवद्ध रहने हाम्रो परम्परा रहिआएको छ । त्यसैले नयाँ वर्ष हाम्रा लागि देशको साझा राष्ट्रिय लक्ष्य बनाउने र त्यसलाई प्राप्त गर्न संकल्प गर्ने दिन पनि हो,” राष्ट्रपति पौडेलले शुभकामना सन्देशमा उल्लेख गरेका छन् ।

प्रतिनिधि सभा सदस्य निर्वाचन सफलतापूर्वक सम्पन्न भई मुलुकमा उत्पन्न विषम परिस्थितिले निकास पाएको र जनताको नयाँ जनादेशबाट नयाँ सरकार गठन भइसकेको बताउँदै उनले निर्वाचनमार्फत नेपाली जनताले संघीय लोकतान्त्रिक गणतन्त्रात्मक शासन व्यवस्थाको माध्यमद्वारा विधिको शासन, दिगो शान्ति, सुशासन, सामाजिक न्यायसहितको विकास र समृद्धिको चाहना अभिव्यक्त गरेका बताएका छन् ।

नेपालको संविधान र संघीय लोकतान्त्रिक गणतन्त्रले अभिष्ट राखेको सुशासनमार्फत सामाजिक न्यायसहितको विकास र समृद्धिको उचाई छुन कसैले रोक्न नसक्ने राष्ट्रपति पौडेलको भनाई रहेको छ ।