भिडियोमा हेर्नुस् रोचक दृश्य,काँग्रेसको घेराबाट यसरी फुत्किए शिक्षामन्त्री

काठमाडौं– शुक्रबारको संसद बैठकमा राष्ट्रिय चिकित्सा शिक्षा विधेयक प्रस्तुत गर्ने कार्यतालिका झण्डै डेढ घण्टा ढिलो सुरु भयो ।पक्ष विपक्षमा सत्तापक्ष र विपक्ष विधेयकको आ–आफनै अडानमा थिए ।शिक्षामन्त्री गिरीराजमणी पोखरेल सहजै विधेयक प्रस्ताव गर्नसक्ने अवस्थामा थिएनन् । प्रतिपक्ष दलका सांसदहरु बैठक सुरु भएलगत्तैनारावाजी गर्न थालिसकेका थिए । शिक्षामन्त्री गिरीराजमणी पोखरेललाई विधेयक प्रस्तुत गर्न नारावाजीकै बीचमा सभामुख कृष्णबहादुर महराले अनुमति दिए ।

प्रतिपक्ष सांसदलाई रोष्टमतर्फ अघि बढ्न मर्यादापालकहरु रोकिरहेका थिए । प्रतिपक्ष सांसदहरु मन्त्री पोखरेललाई रोष्ट्रमतर्फ जानबाट रोक्न चनाखो भएर बसेका थिए ।यतिकैमा आसनबाट उठेर रोष्ट्रमतर्फ अघि बढ्न मन्त्री पोखरेल खोजे । विपक्षी सांसदहरुले धकेलाधकेल गर्न थाले । तर, मन्त्री पोखरेललाई मर्यादापालकले घेरेर फुत्तै रोष्ट्रममा पुर्याए ।

त्यसवेलासम्म सभामुखले प्रतिपक्षी सांसदहरुलाई बस्न आग्रह गरिरहेका थिए । काँग्रेस सांसदको घेराबन्दीबाट रोष्ट्रममा पुगेका पोखरेलले सुरुमा हात हल्लाए । त्यसपछि चस्मा मिलाए । लगत्तै दुई हातले माइक मिलाउँदै पोखरेलले फटाफट विधेयक प्रस्तुत गर्दै छलफलका लागि प्रस्ताव गरे ।

भने, ‘सम्माननीय सभामुख महोदय, सभामुख महोदयको अनुमतिले शिक्षा तथा स्वास्थ्य समितिको प्रतिवेदनसहितको राष्ट्रिय चिकित्सा शिक्षा विधेयक २०७५ माथि छलफल गरियोस् भनि प्रस्ताव प्रस्तुत गर्छु धन्यवाद ।’