बुधबार, कार्तिक १९ २०८३ | Wednesday 4th November 2026 
राजनीति
संसदको प्रमुख प्रतिपक्षी दल नेपाली कांग्रेसका नेता डा.चन्द्र भण्डारीले नेताहरुले भ्रष्टाचार नगरेको भए नेपाल धेरै राम्रो बनिसकेको हुने थियो भन्दै भ्रष्टाचारकै कारण मुलुकको विकासले गति लिन नसकेको बताएका छन् ।
‘भ्रष्टाचारका कारण दुई जना पूर्व कर्मचारीले त आत्महत्या गरे अब राजनीतिक दलका नेताहरुले पनि आत्महत्या गर्ने दिन आउन सक्छ’, उनले भने ।
सोमबार बुटवलमा आयोजित एक कार्यक्रमा बोल्दै नेता भण्डारीले काँग्रेसका धेरै नेता भ्रष्टाचारमा जेल सजाय भोगेपनि नेकपाले खुलमखुला भइरहेका भ्रष्टाचारलाई लुकाइरहेको बताए ।
वाइडबढी, बालुवाटार जग्गा, बूढीगण्डकी, एनसेल लगायतका काण्डका दोषीलाई कारबाही गर्न सरकारले चासो नदिएको उनको आरोप छ ।
काँग्रेस केन्द्रीय सदस्य समेत रहेका भण्डारीले सभापति शेरबहादुर देउवाले पोखरामा हुने उपनिर्वाचनमा पार्टीलाई जिताउन सके सभापतिको कार्यकाल लम्वाउन र नजिते छाड्न सुझाव दिए।
उनले भने, ‘दूध नदिने गाई÷भैसी कहिलेसम्म पालिरहने पोखराको उपनिर्वाचन जिताउनु भयो भने कति लम्बाउने हो लम्वाउनु होला होइन भने सधै कति पाल्ने ?’
उनले सरकार परिवर्तनको खेल कसैका लागि राम्रो नहुने भन्दै ५ वर्षसम्म केपी ओलीलाई नै सरकार चलाउन दिनुपर्ने बताए ।
तर भण्डारीले केपी ओली नेतृत्वको सरकारका सवै पखेटाहरुमा खिया लागिसकेको टिप्पणी गरे ।
‘मन्त्रीहरु, आसेपासेहरु खराब छन् यहा त गर्छु भन्दा पनि काम गर्ने अबस्था नै छैन’, उनले भन ।
ओलीले निर्वाचनका बेला देखाएको राष्ट्रवाद अहिले उदांगिदै गएको पनि उनले बताए ।
गुल्मीका पहिरो प्रभावित क्षेत्रको स्थलगत अवलोकन र सहयोग गरी फर्किएका उनले गुल्मीको अवस्था दर्दनाक भएको बताए । केही राष्ट्रिय मिडियाले राजनीति गर्दा गुल्मीको अवस्था थप विकराल बनेको उनको भनाइ छ ।
‘त्यहाँ कति पीडा छ, महामारीको अवस्था छ, केही व्यक्तिले हेलिकप्टरबाट दुई जना बालिकालाई उपचारका लागि लगेको र मिडियाले त्यसैलाइ मात्रै हाइलाइट गर्दा यहाँको वास्तविक अवस्था छायामा पर्यो,’ उनले भने ।
उनले मानवीय हिसावले पार्टी र आफूले ३ लाख नगद सहयोग गरेको उनले बताए । भण्डारीले संघीय र प्रदेश सरकारले पहिरो पिडीतलाई पर्याप्त सहयोग गर्न नसकेको पनि बताए
