आफैंलाई गोली हान्न लगाएर धार्मिक हिंसा फैलाउने श्रीनिवासाचार्यको योजना यसरी भयो असफल

काठमाडौं– विराटनगरमा गोली लागेर घाइते भएका धर्मगुरु श्री निवासाचार्य भारतको राजधानी नयाँ दिल्ली जाने क्रममा त्रिभुवन अन्तराष्ट्रिय विमानस्थलबाट सोमबार पक्राउ परेका छन् ।

प्रहरीले अनुसन्धानबाट गोली प्रहारको घटना उनी आफैंको योजनामा घटाइएको खुल्न आएपछि पक्राउ गरिएको जनाएको छ । उनले हिन्दुराज्यको पक्षमा लबिङ गर्दै आएका छन् ।

श्रीनिवासाचार्यले प्रहरीलाई केही उपाय गर्दा पनि देशलाई हिन्दुराज्य बनाउन नसकिएपछि यस्तो विधि अपनाउनुपरेको बयान दिएको मोरङ प्रहरी प्रमुख एसपी अरुणकुमार विसीले बताए ।

उनकै योजनामा गोली हान्ने, पेस्तोल उपलब्ध गराउने र त्यसको तयारीमा लाग्ने ३ युवकलाई पनि प्रहरीले पक्राउ गरी जिल्ला प्रहरी कार्यालय मोरङमा सोमबार सार्वजनिक गरेको छ ।

पक्राउ पर्नेमा नवलपरासीको गैँडाकोट–५ बस्ने ३२ वर्षीय खान, सन्तोष भनिने लक्ष्मीराज अधिकारी र चितवनकै माधव चौधरी पक्राउ परेका छन् । चौधरी आचार्यका अंगरक्षक समेत हुन् ।

आचार्यलाई गोली प्रहार गर्ने उनकै अंगरक्षक चौधरी भएको समेत खुलासा भएको छ । अंगरक्षकलाई नै आफुमाथि गोली प्रहार गर्न आचार्यले लगाएको प्रहरीको दाबी छ । पेस्तोल र गोलीको व्यवस्थापन भने नवलपरासीका ३२ वर्षीय खान थरका युवक र लक्ष्मीनाथ अधिकारीले गरेको प्रहरीको भनाई छ ।

प्रहरीका अनुसार गोली प्रहार गर्नका लागि अधिकारीले चौधरीलाई तालिम समेत दिएका थिए । पक्राउ परेका आचार्यलाई कुन मुद्धा लगाउने भन्ने फैसला विषयमा फैसला भैसकेको छैन । अंगरक्षक चौधरी र अधिकारीलाई भने ज्यान मार्ने उद्योगमा मुद्धा चलाउने तयारी भैरहेको प्रहरीले जनाएको छ ।

उनीमाथि चैत २५ गते मोरङमा गोली प्रहार भएको थियो ।