डेरामा सम्बन्ध, अविवाहित किशोरीले गरिन् आफ्नै शिशुको हत्या

जाजरकोट- अवैध यौन सम्बन्धबाट जन्मेको शिशुको हत्या गरेको अभियोगमा एक किशोरीलाई जन्मकैदको सजाय गरिएको छ।

नलगाड नगरपालिका–१ की १९ वर्षीया सविता पुनलाई जिल्ला अदालत जाजरकोटले यस्तो सजाय गरेको हो। जिल्ला न्यायाधीश देवकुमार गिरीको एकल इजलासले अवैध सम्बन्धबाट बच्चा जन्माई उक्त बच्चाको हत्या गरेको ठहरसहित जन्मकैदको सजाय सुनाएको हो।

शिव व्यावसायिक मावि, कालेगाउँमा कृषि विषयको जेटिए अध्ययन गर्नका लागि भेरी नगरपालिका–१ रावतगाउँमा उनी बस्दै आएकी थिइन्। प्रहरीका अनुसार डेरामा बस्ने क्रममा अवैध रुपमा गर्भवती भएकी उनले गत बैसाख २६ गते बच्चा जन्माएकी थिइन्। पुनले उक्त बच्चाको हत्या गरेर प्लास्टिकको थैलोमा पोको पारेर भेरी नदीमा फालिदिएकी थिइन्।

घटनालगत्तै सवितालाई पक्राउ गरी पुर्पक्षका लागि थुनामा राखेर अनुसन्धान थालिएको थियो। जिल्ला अदालतको फैसलापछि उनलाई कारागार चलान गरिएको जिल्लाका प्रहरी नायब उपरीक्षक रवीन्द्रबहादुर सिंहले जानकारी दिए।रासस