बिहिबार, कार्तिक २० २०८३ | Thursday 5th November 2026 
राजनीति
प्रधानमन्त्री शेरबहादुर देउवा र एमाले अध्यक्ष केपी शर्मा ओलीबीचको वार्ता सकिएको छ। राती सवा १० बजे देउवा बालकोटबाट बालुवाटार फर्किएका हु्न। बालकोटबाट बाहिरिने क्रममा देउवाले कुनै प्रतिक्रिया दिन मानेनन् ।
सत्ता गठबन्धनको बालुवाटारमा बिहीबार साँझ बसेको बैठकमा एमसीसीबारे सहमति हुन नसकेपछि देउवा ओली भेट्न बालकोट पुगेका हुन् । देउवाले बालकोटमा ओलीसँग दुई चरण वार्ता गरे । पहिलो चरणको वार्ता गरेर फर्किएका देउवा फेरि बालकोट नै फर्किएका थिए ।
देउवा ओली भेट्न राति ८ बजेर ५० मिनेटमा ओली निवास पुगेका थिए भने १०ः १५ मा फर्किँदा समग्र एमसीसी र अन्य रणनीतिका विषयमा छलफल भएको बुझिएको छ । देउवाले सत्तारुढ दलको असहमतिका बीच एमसीसी भोलिको बैठकमा टेबुल गर्ने बताएका छन् ।
यसैबीच ओलीले पनि कुनै प्रतिक्रिया दिएका छैनन् । ओलीको सचिवालयले देउवासँग भेटवार्ता भएको तर मिडियासँग बोल्ने कुनै विषय नभएको बालकोटमा भेला भएका सञ्चारकर्मीलाई प्रतिक्रिया दियो ।
