मेस्सी भेट्ने चाहाना पूरा नभइ अस्ताए नेम्वाङ

संविधानसभा का अध्यक्ष तथा एमाले उपाध्यक्ष सुवासचन्द्र नेम्वाङकाे फुटबल स्टार लियाेनेल मेसी भेट्ने चाहाना अधुरै रहेकाे छ। गतराती हृदयाघातका कारण निधन भएका नेता नेम्वाङ फुटबल खेलसँगै अर्जेन्टिना र लियोनेल मेस्सीका फ्यान थिए । संविधान सभाका अध्यक्ष सुवास नेम्वाङ । उनी मेस्सीले खेल्ने हरेक खेल हेर्न छुटाउँदैन थिए ।

गत मंसिर ४ मा सम्पन्न चुनावकाे बेला उनी उम्मेदवार रहेको इलाम क्षेत्र नम्बर–२ को मतगणना चलिरहँदा नेम्वाङ भने विश्वकपमा मेस्सीको खेल हेर्न व्यस्त थिए । राति विश्वकपमा मेस्सीको गोलमा अर्जेन्टिनाले मेक्सिकोलाई हरायो, बिहान नेम्वाङले नेपाली कांग्रेसका डम्बरबहादुर खड्कालाई हराउँदै प्रतिनिधि सभा सदस्यमा निर्वाचित भए । चुनाव जितेपछिको पहिलो भाषणमा नेम्वाङले मेस्सी र आफूसँगै जितेकोमा खुसी व्यक्त गरेका थिए ।

नेकपा एमालेका उपाध्यक्ष समेत रहेका नेता नेम्वाङ चुनावी चहलपहलकै बीचमा मंगलबार विश्वकप फुटबल हेर्न कतार जाने तयारीमा थिए । सोही तयारी अनुसार नेम्वाङ सोमबार इलामबाट काठमाडौँ पनि आएका थिए । तर काठमाडौँ ओर्लिएसँगै उनको कतार यात्रा रोकियो । कारण थियो, नेपालको तरल राजनीति ।

‘मलाई फुटबल खुब मनपर्छ । अहिले विश्वकप फुटबल कतारमा भइरहेको छ । त्यसमा अर्जेन्टिना र मेस्सीका कारण म आकर्षित हुने नै भएँ । त्यही भएर अर्जेन्टिना र मेस्सीको खेल हेर्न मंगलबार बेलुका कतार जाने मेरो कार्यक्रम थियो । तर देशको स्थिति र मैले तुरुन्तै फर्केर इलामका मतदाताहरुलाई धन्यवाद दिन जानुपर्ने भएकाले पूर्व निर्धारित कार्यक्रम रद्द गरे’, नेम्वाङले भने, ‘त्यही कारण यसपटक टेलिभिजनबाटै हेर्नेमा पुगेको छु ।’

विश्वकपमा समूह सी अन्तरगत पोल्याण्ड र अर्जेन्टिनाबीचको खेल बुधबार राती हुदैथियाे । आजको खेलबाट अर्जेन्टिना नकआउट चरणमा प्रवेश गर्छ कि गर्दैन भन्ने टुंगो लाग्दै थियाे ।

नेम्वाङले पूर्व निर्धारित कार्यक्रम अनुसार आफू कतार गएको भए त्यहाँ मेस्सीलाई प्रत्यक्ष भेटघाट समेत हुने सम्भावना भएको सुनाएका थिए । तर त्यो सम्भावना अहिले टरेको उनको भनाई थियाे । ‘जहाँनेर मेरा लागि ठाउँ बुक भएको थियो, त्यहाँ मेसी पनि आउँने भन्ने थियो, तर म आफै नगएपछि च्याप्टर नै क्लोज भैगयो’, नेम्वाङले भनेका थिए ।

नेम्वाङले अर्जेन्टिनी स्टार मेस्सी भेट्न विश्वकपमा नपाए पनी समय मिलायर पिएसजीकाे खेल हेर्न पेरिस जाने र मेस्सीलाइ भेट्ने बताएका थिए । तर नेम्वाङकाे मेस्सी भेट्ने चाहाना अधुरै रह्याे अनि सदाका लागि अस्ताए ।