हिन्दु आन्दोलन चर्काउदै पुर्व राजा राप्रपा मिलाउदै , अन्य पार्टीमा समर्थक खोज्दै

जनयुद्धको बलमा  ०६२/०६३ को जनआन्दोलन बाट हटेका पुर्व राजा ज्ञानेन्द्र शाहले हिन्दूवादी आन्दोलनको तयारी गरिरहेका छन ।  जसका लागी शाहको पहलमा पटक–पटक विभाजित राष्ट्रिय प्रजातन्त्र पार्टी पुन एकीकरणको तरखरमा छन ।

पुर्व राजा शाहले एकीकरणका लागि दिएको दबाबको एक वर्षपछि तीन राप्रपा एकीकरणको तयारीमा जुटेका हुन् । गत बर्षको हिउँदमा झापा भ्रमणमा पुगेका बेला शाहले राप्रपा एकीकरण गरी हिन्दूवादी आन्दोलन अघि बढाउन दबाब दिएका थिए । तर गणतन्त्र र धर्म निरपेक्षता स्वीकार गरी सत्ताको भत्ता पचाइसकेकाले उनिहरु सजिलै तयार भएनन् ।

ज्ञानेन्द्र शाहको भारतीय संस्थापनसँगका बारम्बारका बैठक सफल भएपछि कुटनीतिक साथ समेत पाउने भएपछि राप्रपा एकीकरणको चरणमा पुगेका हुन् ।

पार्टी एकीकरणको पहल भइरहेको एउटा दलका अध्यक्ष कमल थापाले उल्लेख गरे पनि अन्य बोलेका थिएनन् । तर सरकारको कार्यशैलीको विरोध गर्दै हिन्दूवादी आन्दोलन चर्काउने घोषणा सहित प्रजातान्त्रिक राप्रपाका अध्यक्ष पशुपति शमशेर राणाले पनि त्यस्तो संकेत भने गरिसकेका छन।

सूर्यबहादुर थापा, पशुपति शमशेर राणा, लोकेन्द्रबहादुर चन्द लगायतले ०४७ सालमा आएको प्रजातन्त्रपछि राप्रपा स्थापना गरेका थिए ।

यसरी पार्टी फोड्ने र जोड्नेका खेलाडी थिए पञ्चायतकालमा प्रधानमन्त्री भइसकेका नेताहरू सूर्यबहादुर थापा, लोकेन्द्रबहादुर चन्दका साथै पञ्चायतका मन्त्रीहरू प्रकाशचन्द्र लोहनी, पशुपति शमशेर जबरा, कमल थापा, बुद्धिमान तामाङ, पद्मसुन्दर लावती, रवीन्द्रनाथ शर्मा, राजेश्वर देवकोटा ।

दरबारसँग नजिक रहेका र इतिहास जोडिएको दललाई नै सक्रिय बनाएर शाहले नेपालमा हिन्दूवादी आन्दोलन अघि बढाउने तयारी गरेका छन् । २०१९ मा हुन लागेको भारतको लोक सभाको चुनावमा भारतीय जनता पार्टीले हिन्दूवादी नारालाई बलियो बनाइरहेका बेला त्यसको हावा नेपालमा पनि चलाउने तयारी दरबारको रहेको छ ।

२६ जनवरी, २०१९ मा भारतमा पूर्वराजाले गणतन्त्र दिवसको औपचारिक कार्यक्रममा सहभागीता जनाउनुअघि नेपालमा पनि हिन्दूवादी आन्दोलनलाई मुकाम दिने तयारी भएको छ । सोबीच भाजपाले शाहलाई हिन्दूत्वका निम्ति भारतीय मञ्चमा उभ्याउने तयारी गरेको उच्च स्रोतहरूले जनाएका छन् ।

शाहले हिन्दूवादी आन्दोलन र आवाज नेपाल बलियो बनाउनका लागि नेपाली कांग्रेसको कोइराला कित्तालाई हातमा लिइसकेका छन् । महामन्त्री डा. शशांक कोइरालालगायतले हिन्दूवादी आन्दोलनमा साथ दिनेछन् भने स्व. नेता खुमबहादुर खड्काका पक्षधरले सदनमा पनि आन्दोलनपछिको अवस्थालाई दबाबपूर्ण हिसाबले उठाउने तयारी भएको छ ।

विश्व हिन्दू महासंघ, शिव सेना सक्रिय हुने
कांग्रेसको एउटा कित्ता आन्दोलनमा होमिएपछि सडकमा विश्व हिन्दू महासंघका कार्यकर्ता, कर्मवीर कार्यकर्ता र शिव सेना नेपालले सडक तताउने तयारी गरेको छ ।

देशव्यापी रूपमा हिन्दूत्वको अवस्था बुझ्नका लागि पूर्वयुवराज पारस शाह, शिव सेना नेपालका अध्यक्ष अनिल बस्नेतलगायतको समूह यसअघि देश दौडाहा पुगेको थियो । धर्मको पक्षमा आमसाधारण रहेको बुझेका कारण आन्दोलन चर्काउने तयारी भएको हो ।