शिक्षक आन्दोलन चर्किदै गएपछि शिक्षा मन्त्री भट्टराईले दिइन् राजीनामा

काठमाडौं । शिक्षा, विज्ञान तथा प्रविधिमन्त्री विद्या भट्टराईले राजीनामा दिएकी छिन् ।

शिक्षकहरुले शिक्षा ऐन जारी हुनुपर्ने लगातका मागहरु राखेर काठमाडौं केन्द्रीत आन्दोलन थालेको २० औँ दिनमा मन्त्री भट्टराईले राजीनामा दिएकी हुन् । नेपाल शिक्षक महासंघ र मन्त्रालयबीच बारम्बार संवाद भएपनि सहमति जुट्न नसकिरहेको बेला शिक्षामन्त्रीबाट राजीनामा आएको हो ।

आजको मन्त्रीपरिषद्को बैठक बस्नु अघि मन्त्री भट्टराईले प्रधानमन्त्री केपी शर्मा ओलीलाई राजीनामा बुझाएको बालुवाटार स्रोतले जनाएको छ ।

उनले आन्दोलनरत शिक्षकहरूलाई वार्तामा बोलाए पनि शिक्षकहरू वार्तामा बस्न तयार भएका छैनन्। विधेयक पारित नभएसम्म आन्दोलन जारी राख्ने चेतावनी पनि शिक्षकहरूले दिँदै आएका छन्।