नीति तथा कार्यक्रम प्रतिनिधि सभाबाट पारित

काठमाडौं । सरकारले आगामी आर्थिक वर्ष २०८२/८३ का लागि ल्याएको नीति तथा कार्यक्रम प्रतिनिधि सभाबाट पारित भएको छ । आइतबार बसेको प्रतिनिधि सभाको बैठकमा सभामुख देवराज घिमिरेले नीति तथा कार्यक्रम बहुमतले पारित भएको घोषणा गरे ।

राष्ट्रपति रामचन्द्र पौडेलले २०८२ वैशाख १९ गते प्रतिनिधि सभा र राष्ट्रिय सभाको संयुक्त बैठकमा सरकारको नीति तथा कार्यक्रम प्रस्तुत गरे। यसमा पूर्वाधार सुधार, कर प्रणालीको संरचनागत सुधार, हरित ऊर्जा प्रवर्द्धन, र डिजिटल बैंकिङको प्रवर्धन जस्ता योजनाहरू समावेश छन्।

नीति तथा कार्यक्रममाथि बैशाख २२ देखि २८ गतेसम्म निरन्तर छलफल भएको थियो । छलफलको आज अन्तिम दिन प्रधानमन्त्री केपी शर्मा ओलीले सांसदहरुले उठाएका प्रश्नको जवाफ दिँदै प्रतिनिधि सभाबाट बहुमतले पारित भएको हो ।

बैठकमा नीति तथा कार्यक्रमाथि प्राप्त संशोधनलाई निर्णयार्थ प्रस्तुत गरिएको थियो । सबै संशोधन बहुमत प्राप्त सदस्यबाट अस्वीकार भएका थिए ।

प्रतिनिधि सभाले नीति तथा कार्यक्रम पारित गरेसँगै, आगामी आर्थिक वर्षको बजेट निर्माण प्रक्रिया अघि बढ्नेछ। यसका लागि आगामी जेठ १५ गते बजेट प्रस्तुत गर्ने तयारी भइरहेको छ।