घाइते जेनजीको विवरण फागुन १५ भित्र उपलब्ध गराउन सरकारको निर्देशन

काठमाडौं । सरकारले जेनजी आन्दोलनका क्रममा घाइते भएकाहरुको विवरण फागुन १५ गतेभित्र उपलब्ध गराउन स्वास्थ संस्था (अस्पताल) लाई निर्देशन दिएको छ ।

जेनजी आन्दोलनका क्रममा छुट घाइते भएकाहरुको विवरण उपचारमा संलग्न सबै स्वास्थ संस्थालाई तत्काल मन्त्रालयमा उपलब्ध गराउन निर्देशन दिइएको स्वास्थ तथा जनसंख्या मन्त्रालयका प्रवक्ता डा. प्रकाश बुढाथोकीले जानकारी दिए ।

जनेजी आन्दोलनका घाइतेहरुको उपचार र राहतलाई प्रभावकारी बनाउन गठित समन्वय समितिले यही फागुन १५ गते भित्र घाइतेको विवरण उपलब्ध गराउने निर्णय अनुसार मन्त्रालयले सबै स्वास्थ संस्थालाई निर्देशन दिएको हो ।

घाइतेहरुको सूचीकरण, वर्गीकरण, पुनः वर्गीकरण सम्बन्धी कार्य समयमा सक्नका लागि यही फागुन १ गतेदेखि १५ गतेभित्र विवरण उपलब्ध गराउन भनिएको हो । फागुन १५ गते भित्र आएका निवेदन उपर घाइतेको अन्तिम नामावली सार्वजनिक गरिने प्रवक्ता बुढाथोकीले बताए ।

उनका अनुसार हालसम्म २०० जना घाइतेको मात्रै वर्गीकरण विवरण उपलब्ध भएको छ । जेनजी प्रदर्शनका क्रममा धेरै घाइते भए पनि सामान्य घाइते भएकाहरुलाई केही सुविधा उपलब्ध नहुने भएकाले पनि सम्पर्कमा नआएको हुनसक्ने उनले बताए ।

सरकारले जेनजी प्रदर्शनका क्रममा अति गम्भीर वर्गीकरणमा परेका र ती घाइतेलाई स्याहार गर्नेलाई मासिक रु ९ हजार गम्भीर घाइतेलाई मासिक रु ९ हजार र मध्यम घाइतेलाई मासिक रु ४ हजार उपलब्ध गराउने निर्णय गरेको प्रवक्ता बुढाथोकीले जानकारी दिए ।

उनका अनुसार जेनजी प्रदर्शनको क्रममा २ हजार ५९९ जना घाइते भएको मन्त्रालयको तथ्यांकमा उल्लेख छ ।