भूजडित’बनाउन चीन तयार,एक चीन नेपालको आधार

चिनियाँ विदेशमन्त्री वाङ यीले नेपालसँग उच्च गुणस्तरीय बेल्ट एन्ड रोड (बिआरआई) सहकार्यलाई अगाडि बढाउँदै नेपाललाई भूपरिवेष्ठित राष्ट्रबाट भूजडित राष्ट्रमा रूपान्तरण गर्न तयार रहेको बताएका छन् ।

बेइजिङमा नेपालका परराष्ट्रमन्त्री शिशिर खनालसँगको भेटवार्ताका क्रममा उनले उक्त धारणा राखेका हुन् । वाङले चीनको नेपालप्रतिको मैत्रीपूर्ण नीति सम्पूर्ण नेपाली जनताप्रति केन्द्रित रहेको उल्लेख गर्दै बेइजिङले सधैं काठमाडौंसँगको सम्बन्धलाई आफ्नो छिमेकी कूटनीतिको महत्वपूर्ण स्थानमा राखेको उल्लेख गरेका छन् ।

उनले जनसमर्थनका आधारमा नेपालको नयाँ सरकार प्रभावकारी रूपमा शासन सञ्चालन गर्न सफल हुने चीनको चाहना रहेको बताए । नेपालले ‘एक चीन नीति’प्रति व्यक्त गरेको दृढ प्रतिबद्धता तथा ताइवान र सिजाङ (तिब्बत) सम्बन्धी चीनका मूलभूत हितका विषयमा दिएको समर्थनलाई चीनले उच्च मूल्याङ्कन गरेको पनि उनैले बताए ।

दुई देशबीचका विभिन्न सहकार्य संयन्त्र तथा मञ्चहरूको प्रभावकारी उपयोग गर्दै व्यावहारिक सहयोगलाई गहिरो बनाउनुका साथै जनस्तरको आदानप्रदान विस्तार गर्नुपर्नेमा चीनले जोड दिएको छ ।

वाङले चिनियाँ कम्पनीहरूलाई नेपालमा लगानी र व्यवसाय विस्तार गर्न प्रोत्साहित गरिएको उल्लेख गर्दै नेपालले उनीहरूका लागि अझ निष्पक्ष,पारदर्शी र लगानीमैत्री व्यावसायिक वातावरण निर्माण गर्ने आशा राखेका छन् । बहुपक्षीय मञ्चहरूमा पनि नेपाल र चीनबीच समन्वय बढाउन तथा विकासशील राष्ट्रहरूको साझा हितको रक्षा गर्नुपर्नेमा वाङको जोड छ ।

प्रत्युत्तरमा परराष्ट्रमन्त्री खनालले नेपालको नयाँ सरकार जनमुखी विकासप्रति प्रतिबद्ध रहेको र नेपालले असंलग्न परराष्ट्र नीतिलाई निरन्तरता दिने बताए ।

उनले नेपालको विकास र जनजीविकामा सुधार ल्याउन चीनले लामो समयदेखि पुर्याउँदै आएको सहयोगका लागि धन्यवाद व्यक्त गर्दै चीनले नेपाललाई सधैं समान हैसियतमा व्यवहार गरेको तथा नेपालको सार्वभौमसत्ता र स्वतन्त्रताको सम्मान गरेको बताए ।

खनालले ताइवान र सिजाङका विषय चीनका आन्तरिक मामिला भएको उल्लेख गर्दै नेपाल ‘एक चीन नीति’प्रति दृढ रहेको, चीनको पूर्ण राष्ट्रिय एकीकरणलाई समर्थन गर्ने र नेपालको भूमि चीनविरुद्ध प्रयोग हुन नदिने प्रतिबद्धता दोहोर्याएका छन् ।

चीनको विकासलाई नेपालका लागि अवसरका रूपमा व्याख्या गर्दै उनले चिनियाँ लगानीलाई नेपालले स्वागत गर्ने तथा कानुनसम्मत, निष्पक्ष र मैत्रीपूर्ण व्यावसायिक वातावरण उपलब्ध गराउने बताए।

उनले उच्च गुणस्तरीय बिआरआई सहकार्यमा सक्रिय सहभागिता जनाउने, पूर्वाधार तथा अन्तरआबद्धता विस्तार गर्ने, विभिन्न क्षेत्रमा पारस्परिक लाभका आधारमा सहकार्य बढाउने र बहुपक्षीय मञ्चहरूमा समन्वय सुदृढ गर्ने प्रतिबद्धता व्यक्त गरेका छन् ।

खनालले मानवताको साझा भविष्य निर्माण गर्ने अवधारणाप्रति नेपाल सकारात्मक रहेको र चीनले अघि सारेका विभिन्न विश्वव्यापी पहलहरूलाई सक्रिय समर्थन गर्ने बताए।

समाचार स्रोत : चाइना डेली,