तत्कालीन भन्सार अधिकृतसहित ६ जनाविरुद्ध ७५ करोडको मुद्दा दायर

काठमाडौं– राजस्व अनुसन्धान विभागले सामान पास गर्ने रसुवा भन्सारका तत्कालीन भन्सार अधिकृतसहित ६ जनाविरुद्ध मुद्दा दायर गरेको छ। विभागले ती अभियुक्तविरुद्ध करिब ७५ करोड रुपैयाँ मागदाबी गर्दै जिल्ला अदालत काठमाडौंमा सोमबार मुद्दा दायर गरेको हो।

विभागले रसुवा भन्सारका तत्कालीन भन्सार प्रमुख
पवित्रकुमार खड्का र नायव सुब्बा  धिरजकुमार थापा  तथा मितेरी इन्टरनेसनलका प्रोपाइटर  सुमन श्रेष्ठ तथा सामानधन रञ्जन त्रिपाठी लाई मुख्य अभियुक्त बनाई मुद्दा दायर गरेको हो।

उनीहरूविरुद्ध जरिवानासहित जनही १५ करोड रुपैयाँ बिगो र ३ वर्ष कैद मागदाबी गरिएको छ।

त्यस्तै, दुई जनालाई मतियारका रुपमा मुद्दा दायर गरिएको छ। जसमा लाङटाङ ट्रेड कन्सर्नका प्रोपाइटर धनबहादुर तामाङ र गाडी चालक डम्बरबहादुर श्रेष्ठ छन्। उनीहरू दुवैविरुद्ध जनही ७ करोड ५९ लाख रुपैयाँ बिगो र डेढ वर्ष कैद मागदाबी गरिएको छ।

यी सबैको ‘सेटिङ’ मा गत १८ साउनमा रसुवाबाट पास भएको एक ट्रक सामान विभागले नियन्त्रणमा लिएको थियो। उक्त घटनामा विभागले अनुसन्धान अघि बढाएको थियो।