खाल्डो छल्ने क्रममा ट्रकले ठक्कर दिएपछि तनहुँ दुलेगौंडामा एकको मृत्यु

पोखरा- तनहुँको शुक्लागण्डकी दुलेगौंडा- २ हलेदीमा भएको दुर्घटनामा परी एक जनाको ज्यान गएको छ ।

मंगलवार राति बा ४ ख ७१० नम्बरको ट्रकले ना ४६ प ५५१४ नम्बरको मोटरसाइकललाई ठक्कर दिँदा मोटरसाइकलमा सवार अर्घाखाँचीका नन्द कुमार श्रेष्ठको मृत्यु भएको प्रहरीले जनाएको छ ।

सडकमा रहेको खाल्डो छल्ने क्रममा ट्रकले ठक्कर दिएपछि गम्भीर घाइते भएका श्रेष्ठलाई उपचारको लागि जीपी कोइराला राष्ट्रिय श्वासप्रश्वास उपचार केन्द्र बेलचौतरामा लैजाँदै गर्दा बाटोमा मृत्यु भएको हो ।

ट्रकको पछाडिको टायरले मोटरसाइकललाई ठक्कर दिएपछि सो घटना भएको प्रहरीले जानकारी दिएको छ । घटनाका बारेमा आवश्यक अनुसन्धान भइरहेको प्रहरीले जनाएको छ ।

नरेन्द्र मोदी फेरी नेपाल भ्रमणमा आउदै

छिमेकी मुलुक भारतका प्रधानमन्त्री नरेन्द्र मोदीले पुनः नेपालको भ्रमण गर्ने भएका छन् । नोभेम्बरको अन्तिम साता उनको भ्रमण हुने नेपालस्थित भारतीय दूतावासले जनाएको छ ।

बिमस्टेक सम्मेलनमा सहभागि भएर भारत फर्केका उनले पुनः चौथो नेपाल भ्रमण गर्न लागेको बताइएको छ ।

नेपाल भ्रमणमा आउँदा प्रधानमन्त्री मोदीले यसपटक लुम्बिनीको भ्रमण गर्ने निश्चित भएको छ । पहिलोपटक भ्रमण गर्दा देखिनै लुम्बनी भ्रमण गर्ने तय भएपनि प्रधानमन्त्री मोदी विभिन्न कारणले त्यहाँ पुग्न सकिरहेका थिएनन् ।

यसपटक लुम्बिनी भ्रमणलाई विशेष प्राथमिकतामा राखेर प्रधानमन्त्री मोदी नेपाल भ्रमणमा आउन लाग्नुभएको बताइएको छ ।

उनले बैशाखमा नेपाल भ्रमणमा आउँदा जसरी जनकपुर भ्रमणलाई विशेष प्राथमिकतामा राखेका थिए, त्यसरीनै यसपटक लुम्बनी भ्रमणलाई प्राथमिकतामा राखेको स्रोतले जनाएको छ ।

त्यसबाहेक अन्य उच्चस्तरीय भेटघाट हुने बताइएको छ । यद्यपि, अहिले भ्रमणको मिति र कार्यक्रम तय नभएको उक्त स्रोतको दावी छ ।