‘कीर्तिपुर महिला महोत्सव’मा अतिथि सवै पुरुष भए पछी

पोखरा –‘कीर्तिपुर महिला महोत्सव’को निकै आलोचना भएको छ। नाम महिला महोत्सव तर उद्घाटन समारोहमा प्रायः सबै अतिथि पुरुष भएको भन्दै ‘कीर्तिपुर महिला महोत्सव’को निकै आलोचना भएको हो । सामाजिक सञ्जालमा उद्घाटन समारोहको तस्बिर राखेर आलोचना गर्नेहरु धेरै छन् ।

बिहीबार भएको उद्घाटन समारोहमा कीर्तिपुर महानगरपालिकाकी उपप्रमुखबाहेक अरु सबै अतिथि पुरुष थिए । नाम चाहिँ कीर्तिपुर महिला महोत्सव, तर उद्घाटनमा चाहिँ किन पुरुष मात्रै भनेर प्रश्न गर्नेहरु धेरै भए पनि आयोजकले जवाफ दिएका छैनन् ।

तर महोत्सवमा राखिएका सबै स्टलमा भने महिलाको मात्रै सहभागिता देखिएको थियो । महिलाले उत्पादन गरेका विभिन्न सामग्री प्रदर्शनीमा राखिएको थिए । नेवारी संस्कृति र परम्पराको प्रदर्शन गरी कीर्तिपुर महिला महोत्सव शनिबार सकिएको छ ।

कीर्तिपुर नगरपालिकाको आयोजनामा भएको महोत्सवमा १ नम्बरदेखि १० नम्बर वडाका विभिन्न व्यक्ति तथा समूहले उत्पादन गरेका सामग्री, नेवारी खाजाको परिकार, हाकुपटासी बुन्ने तरिका, चिउरा उत्पादन गर्ने पुरानो प्रविधि, कृषिजन्य सामग्रीका विभिन्न स्टल राखिएको थियो ।

यस्तै नेवार समुदायका महिलाहरुको भेषभुषा, परम्परा, मौलिक जीवनशैली बुझाउने संस्कृति र संस्कारको जीवन्त प्रदर्शनी पनि गरिएको थियो । महोत्सव अवधिभर लाखे नाच, धिमे बाजा, विभिन्न सांस्कृतिक झाँकीको प्रदर्शनीले आकर्षण थपेको थियो ।