लाइसेन्स निकालिदिने भन्दै घुस लिदै गरेको अवस्थामा पोखरामा दुई जना प्रकाउ

पोखरा- स्काभेटरको लाइसेन्स निकालिदिने भन्दै घुस लिदै गरेको अवस्थामा पोखरामा एक व्यक्तिलाई अख्तियारले प्रकाउ गरेको छ।एक व्यक्तिसँग ४० हजार घूस लिँदालिँदै हेवी इक्विपमेन्ट डिभिजन कार्यालय पोखरामा द्वितीय अपरेटर पदमा कार्यरत कुमार लामिछानेलाई सोमबार राति अख्तियार कार्यालय पोखराले पक्राउ गरेको हो ।

यसै गरी उनलाई सहयोग गर्ने गरेको भन्दै मेट्रो ड्राइभिङ इन्स्ट्च्यिूटका संचालक खगेन्द्रप्रसाद काफ्लेलाई पनि पक्राउ गरिएको अख्तियारले जनाएको छ ।
लामिछानेले यातायात व्यवस्था कार्यालय सवारी चालक अनुमतिपत्र कास्कीबाट लिखित परीक्षा र ट्रायलमा उत्तीर्ण गराइदिने भनी सेवाग्राहीसँग घूस मागेको सूचना र उजुरीका आधारमा घूस रकमसहित रंगेहात पक्राउ गरिएको अख्तियारले जनाएको छ । ड्यामसाइडस्थित बार्दली रेष्टुरेन्ट एन्ड बारबाट दुवैजनालाई पक्राउ गरिएको हो ।

यसैगरी ड्राइभिङ इन्स्टिच्युटका संचालक काफ्लेको साथबाट १ लाख ६ हजार नगद, डायरीलगायत अन्य प्रमाणहरु बरामद भएको अख्तियार स्रोतले जनाएको छ ।

लाइसेन्स निकालिदिने भन्दै काफ्लेले विभिन्न व्यक्तिबाट उक्त रकम लिएका थिए । सत्यतथ्य एकिन गर्न र यातायात कार्यालयका कर्मचारीको संलग्नता भएनभएको बारे थप छानबिन भइरहेको अख्तियारले जनाएको छ ।