बिभिन्न विधामा पोखरामा पत्रकार सम्मानित

गण्डकी- रेन्बो चिल्ड्रेन होम नेपालले राष्ट्रिय समाचार समिति राससका पत्रकार हरि बाँस्तोलालाई सम्मान गरेको छ ।

संस्थाको ११औँ वार्षिक साधारणसभा तथा पाँचौँ अधिवेशनको अवसरमा बालबालिकाको सम्बर्द्धन र विकासमा पत्रकारिताको माध्यमबाट योगदान पुर्याएकामा उनीसहित गोरखापत्र दैनिकका तारा चापागाई र गोर्खाली रेडियोका खिमा गुरुङलाई गण्डकी प्रदेशका उपसभामुख सिर्जना शर्माले सम्मान गरेकी हुन् ।

यसैगरी एसइई परीक्षामा उच्च अङ्क ल्याउने बालबालिकाका साथै उत्कृष्ट कार्य गर्ने उक्त संस्थाका कर्मचारी सम्मानित भएका थिए । उपसभामुख शर्माले बालबालिकाको हक, अधिकार र रक्षाका लागि बालमैत्री कानून निर्माण गर्ने प्रतिबद्धता व्यक्त जनाइन ।

उनले यस संस्थाले सहाराविहीन बालबालिकालाई आवासीयरूपमा शिक्षा-दिक्षाको व्यवस्था गरेर प्रशंसनीय कार्य गरेको बताइन । हाल ३५ बालबालिकालाई आवासीय सुविधासहित अध्यापन गराउँदै आएको उक्त संस्थाले विभिन्न स्थानका ४१ बालबालिकालाई शैक्षिक सहयोग उपलब्ध गराउँदै आएको छ ।