त्रिशला गुरुङले गरिन् रास्वपाको समानुपातिक उम्मेदवारी फिर्ता

काठमाडौं । गायिक डा. त्रिशला गुरुङले आगामी फागुन २१ गते हुने प्रतिनिधिसभा निर्वाचन समानुपतिक तर्फ राष्ट्रिय स्वतन्त्र पार्टी (रास्वपा) बाट बन्द सूचीको उम्मेदवारी फिर्ता लिने घोषणा गरेकी छिन् ।

त्रिशला रास्वपासँग एकता गरेको उज्यालो नेपाल पार्टीको कोटाबाट आदिवासी जनजाती महिलाको कलस्टरमा समावेश थिइन् । तर, उनले आज सामाजिक सञ्जाल फेसबुकमा एक स्टाटस जारी गर्दै आफूले समानुपातिक बन्द सूचीबाट आफ्नो उम्मेदवारी फिर्ता लिएको जानकारी गराएकी छिन् ।

मूल कारण भनेको आफ्नो पेशागत जिम्मेवारीप्रति पूर्ण समर्पण गर्दै कला र स्वास्थ्य क्षेत्रमा निरन्तर रूपमा सेवा प्रदान गर्नु तथा नागरिक समाज र समुदायप्रति स्वतन्त्र हैसियतबाट योगदान पुर्‍याउने आफ्नो दृढ संकल्प रहेको उनको भनाई रहेको छ ।

यस्तो छ उनले फेसबुकमा जारी गरेको स्टाटसः

उज्यालो नेपाल पार्टी (राष्ट्रिय स्वतन्त्र पार्टी) बाट समानुपातिक प्रतिनिधित्वका लागि उम्मेदवारका रूपमा सिफारिस गरिनु मेरो लागि ठूलो सम्मान र जिम्मेवारीको विषय हो। यस अवसरका लागि पार्टी नेतृत्व, सम्बन्धित निकाय तथा सम्पूर्ण शुभेच्छुकहरूप्रति म हार्दिक आभार व्यक्त गर्दछु।

यद्यपि, गहन आत्ममूल्यांकन पश्चात मैले उक्त उम्मेदवारीबाट पछि हट्ने निर्णय लिएको जानकारी गराउन चाहन्छु। यस निर्णयको मूल कारण भनेको मेरो पेशागत जिम्मेवारीप्रति पूर्ण समर्पण गर्दै कला र स्वास्थ्य क्षेत्रमा निरन्तर रूपमा सेवा प्रदान गर्नु तथा नागरिक समाज र समुदायप्रति स्वतन्त्र हैसियतबाट योगदान पुर्‍याउने मेरो दृढ संकल्प हो।

म माथि पार्टीले देखाएको विश्वास, सम्मान र समर्थनलाई सदैव उच्च मूल्यांकन गर्नेछु र उक्त भरोसालाई कहिल्यै कमजोर हुन नदिने प्रतिबद्धता व्यक्त गर्दछु। राजनीतिक पदमा नरहँदा पनि समाज, स्वास्थ्य क्षेत्र र समुदायको आवाजका रूपमा आफ्नो क्षमता र विवेकअनुसार निरन्तर योगदान पुर्‍याइरहनेछु।

अन्त्यमा, पार्टीको भावी यात्राका लागि हार्दिक शुभकामना व्यक्त गर्दछु।

डा. त्रिशाला गुरुङ