आफ्नै अंगरक्षक सग तेस्रो बिबाह गर्दै राजा

बैंकक । राज्याभिषेकको तीन दिनअघि थाई नरेश महाबजिरालोङकोरनले आफ्नै अगंरक्षकसँग तेस्रो बिहे गरेका छन् ।

६६ वर्षीय नरेशले ४० वर्षीया सुथिदासँग बुधबार बिहे गरेको थाई राजदरबारले जनाएको छ ।

सुथिदाले राजाको विशेष सुरक्षा दस्तामा रहेर लामो समयसम्म काम गरेकी छन् । शाही सुरक्षामा जोडिनुअघि उनी थाई एयरलाइन्समा परिचारिका थिइन् ।

त्यसैबेला थाई यूवराजले उनलाई भेटेको कतिपय सञ्चारमाध्यामले लेखेका छन् ।

थाई नरेश युवराजले नै उनलाई राजदरबारको सुरक्षा हेर्ने निकायमा राखेका थिए । युवराजको सुरक्षामा राम्रो काम गरेको भनेर उनले सन् २०१२ मा पदक पाइन् । अहिलेसम्म उनले छ वटा पदक पाइसकेकी छन् ।

सन् २०१३ मा उनलाई मेजर जनरलमा पदोन्नती गरिएको थियो । आफू राजा भएपछि थाई नरेशले उनलाई फेरि पदोन्नती गरेर फुल जनरल बनाएका थिए । अहिले सुथिदा राजाको सुरक्षा हेर्ने निकायको उपप्रमुख छिन् ।