मन्त्री फेर्नेबारे प्रचण्ड निकटका नेताको बेग्लै बोली, खुमलटारमा बाक्लै बैठक

सत्तारुढ नेपाल कम्युनिस्ट पार्टी (नेकपा)का दोस्रो अध्यक्ष पुष्पकमल दाहाल ‘प्रचण्ड’ले मन्त्रीहरू हेरफेर हुने भनेर हलचल ल्याइदिएका बेला प्रचण्ड निकटका एक जना नेताले मन्त्री फेर्ने कुनै सहमति नभएको दाबी गरेका छन् ।

दाहालले केही दिन अगाडि पोखरामा आयोजित पत्रकार सम्मेलनमा पार्टी अध्यक्ष समेत रहेका प्रधानमन्त्री केपी ओलीसँग मन्त्री फेर्ने सहमति भएको बताएका थिए । दाहालको यो अभिव्यक्तिले पूरै देश तरंगित बनेको थियो ।

शुक्रबार बिहान आफू निकटका नेताहरूसँग ललितपुरको खुमलटारमा भएको गोप्य छलफलमा नेकपाका दोस्रो अध्यक्ष दाहालले मन्त्री फेर्ने बारेमा आफूले दिएको अभिव्यक्तिलाई फेरेको उनकै नेताले बताएका हुन् ।

नेपाली रेडियो नेटवर्कको नेपाली बहस कार्यक्रममा पत्रकार ऋषि धमलासँग शनिबार बिहान कुरा गर्दै हरिबोल गजुरलेलले तत्काल मन्त्री फेर्ने कुनै सहमति नभएको बताए ।

‘प्रचण्ड कमरेडसँग शुक्रबार मेरो भेटवार्ता र कुराकानी भएको थियो । उहाँलाई मन्त्री फेर्ने हल्लाका बारेमा मैले सोधेको थिएँ । उहाँले त्यस्तो केही कुरा वा सहमति भएको छैन भन्नुभएको छ’, उनले भने, ‘प्रधानमन्त्री र प्रचण्ड कमरेडको मन्त्री फेर्ने कुराका बारेमा मैले आफैले सोधको हुँ । उहाँले होइन भन्नुभयो ।’

मन्त्री फेर्ने हल्लासँग असन्तुष्ट बनेका प्रधानमन्त्री ओलीले शुक्रबार मन्त्रीहरूसँगको छलफलमा हल्लाको पछाडि नलाग्न आग्रह गरेका थिए । उनले मन्त्री फेर्ने कुरा गरेर सरकारलाई कमजोर बनाउन खोजेको भन्दै काम गरेर देखाउन निर्देशन दिएको एक जना मन्त्रीले बताएका छन् ।

दुई दिन अगाडि नेकपाका वरिष्ठ नेता माधवकुमार नेपाल प्रधानमन्त्री ओली र दोस्रो अध्यक्ष दाहाललाई अलग अलग भेटेर पार्टीभित्रको विवाद अन्त्य र मन्त्री फेर्नेबारेमा कुराकानी गरेको चर्चा पनि छ । नेता नेपालले सरकारको कामकारबाहीप्रति असन्तुष्टि जनाएको एक नेताले बताएका छन् ।

उता मन्त्री फेर्ने चर्चा र समाचार आएपछि नेकपाका सांसदहरू लबिङमा लागेका छन् । योगेश भट्टराई, महेश बस्नेत, प्रभु साहसहित नेताहरू लबिङमा लागेको चर्चा छ ।