दरबार हत्याकाण्ड भएको १७ वर्ष पूरा “छानविन गरेरै छाड्ने प्रतिबद्धता,गफमा मात्रै सीमित”

आज तत्कालीन राजा वीरेन्द्रको वंशनाश हुने गरी राजपरिवारका १० सदस्यको दरबार हत्याकाण्ड भएको १७ वर्ष पूरा भएको छ।

२०५८ साल जेठ १९ गते राति तत्कालीन राजा वीरेन्द्रसँगै रानी ऐश्वर्या, युवराज दिपेन्द्र र निराजन, युवराज्ञी श्रुतिसहित राजपरिवारका १० जनाको हत्या भएको थियो ।

दरबार हत्याकाण्ड भएको १६ वर्ष पूरा हुँदासमेत हत्याकाण्डको बास्तविक रहस्य सार्वजनिक हुन सकेको छैन्।

युवराज दिपेन्द्रले नसाको सुरमा उक्त हत्याकाण्ड मच्चाएको दरवार हत्याकाण्डको छानबिन गर्न गठित समितिले प्रतिवेदन सार्वजनिक गरेको थियो। तर अधिकांश नेपालीले त्यसलाई पत्याएका छैनन्। नेपालमा मात्र नभई विश्वमा नै चर्चित बनेको दरवार हत्याकाण्डको रहस्य अहिले पनि गर्भमै छ।

सबैले दरबार हत्याकाण्डमा षड्यन्त्र भएको बताउने गरेका छन्। तर, त्यो षड्यन्त्र कसले ग¥यो? यथार्थ सार्वजनिक गर्ने हिम्मत कसैले गरेका छैनन्। दरवार हत्याकाण्डपछि दर्जनौं पटक सरकार परिवर्तन भए पनि त्यसको वास्तविकता खोजी गर्ने आँट कुनै सरकारले गरेको छैन।

पूर्वराजा ज्ञानेन्द्रमाथि हत्याकाण्डपछि प्रमाण नष्ट गरेको आरोप लाग्दै आएको छ। राजकाज सम्हालेका तत्कालिन राजा ज्ञानेन्द्रले  हत्याकाण्ड भएको भोलिपल्टै श्रीसदनमा ताल्चा लगाउन निर्देशन दिएका थिए। ०५८ सालमा लागेको ताल्चा ०६५ सालमा मात्र खोलिएको थियो।

दरबार हत्याकाण्डको रहस्य पत्ता लगाउन नसके पनि सरकारले हत्याकाण्ड लगत्तै पूर्वराजा ज्ञानेन्द्रले भत्काउन लगाएको हत्याकाण्ड स्थलमा त्रिभुवन संग्रहालय निर्माण गरेको छ।

उक्त संग्रहालय खुलेदेखि अहिलेसम्म स्वदेशी तथा विदेशी गरेर २७ लाख ६५ हजार ६ सय ५१ जनाले अवलोकन गरिसकेका संग्रहालयका प्रमुख रोहित ढुंगानाले जानकारी दिए।

दरवार हत्याकाण्डपछि तत्कालिन प्रधानमन्त्री स्वर्गिय गिरिजाप्रसाद कोइराला, माओवादीका अध्यक्ष पुष्पकमल दाहाल प्रचण्ड, माधव नेपाल लगायतका नेताहरुले दरबार हत्याकाण्डको छानविन गरेरै छाड्ने प्रतिबद्धता व्यक्त गरेका थिए। तर १७ बर्ष बितिसक्दासमेत नेताहरुको प्रतिबद्धता गफमा मात्रै सीमित भएको छ।