अर्ली चुनाव हुदैन : प्रचण्ड

नेकपा माओवादी केन्द्रका अध्यक्ष पुष्पकमल दाहाल प्रचण्डले मुलुकमा समय अगावैको चुनाव अर्थात् अर्ली इलेक्सन हुने कुनै पनि सम्भावना नरहेको बताउनुभएको छ । संवैधानिक व्यवस्था र सर्वोच्च अदालतको पछिल्लो फैसलाले समेत मुलुक अर्ली इलेक्सनमा जान नमिल्ने उहाँको भनाइ हो ।

हिजो नेकपा एकीकृत समाजवादीका अध्यक्ष माधवकुमार नेपालले पोखरामा सञ्चारकर्मीहरुसँग बोल्दै अर्लि इलेक्सनको सम्भावना नरहेको बताउनुभएको थियो । आज दाहालले जनकपुर पुगेर उक्त कुरा बताउनुभएको हो ।

जनकपुर विमानस्थलमा सञ्चारकर्मीहरुसँग कुराकानी गर्दै दाहालले भन्नुभयो, ‘अर्ली इलेक्सन हुँदैन । हाम्रो संवैधानिक व्यवस्थाले पनि त्यस्तो परिकल्पना गरेको छैन । अर्को सर्वोच्च अदालतले गरेको फैसलाको कारण पनि अर्ली इलेक्सन हुँदैन । कोही कन्फ्युज्ड हुनु पर्दैन ।’

अर्को एउटा सन्दर्भमा अध्यक्ष दाहालले राष्ट्रियसभाको आगामी निर्वाचनमा सत्तारुढ गठबन्धनमा मिलेर चुनाव लड्ने सैद्धान्तिक सहमति भइसकेको जानकारी दिनुभयो । उहाँले सत्तारुढ गठबन्धनले अदालतमा देखिएका समस्याबारे छिट्टै धारणा सार्वजनिक गर्ने पनि बताउनु भएको छ ।