चाेर नामबाट २ उपसभामुख बने केन्द्रीय सदस्य

केन्द्रीय सदस्य घाेषणा गर्दै आइतबार साँझ प्रज्ञा भवनमा नेकपा माओवादी केन्द्रका अध्यक्ष पुष्पकमल दाहाल प्रचण्ड प्रस्तावित केन्द्रीय सदस्यमध्ये चाेर नाम राखेर दुइजना उपसभामुखलाई केन्द्रीय सदस्य बनाएका छन् ।

संसदिय परम्परा अनुसार सभामुख उपसभामुख वा राष्ट्र प्रमुख उपप्रमुख हुदा पार्टीको साधारण सदस्यबाट राजिनामा दिनुपर्ने हुन्छ । तर हिजाे प्रज्ञा भवनमा नाम पढ्दै गर्दा प्रचण्डले दुई सांकेतिक नाम राखेर उपसभामुखलाई केन्द्रीय सदस्य बनाए । २ आदिवासी जनजातितर्फको नाम पढिरहँदा उनी केहीबेर अड्किए । उ…तामाङ । थर प्रष्ट भयो, तर नाम प्रष्ट भएन ।

नामहरु पढ्दै जाँदा प्रचण्ड आदिवासी जनजातितर्फको युवा क्लष्टरमा पुगे । त्यहाँ उनले अर्को एउटा नाम पढे– आर तामाङ । र, भने, ‘अघिको त्यो उ… तामाङ भनेको यही हो ।’ प्रचण्डले यसो भन्दै गर्दा बन्दशत्रमा हाँसो गुञ्जियो ।

प्रचण्डद्वारा केन्द्रीय सदस्यमा नाम घोषणा गरिएकी आर तामाङ राधिका तामाङ हुन् । उनी वागमती प्रदेशसभाकी उपसभामुख छिन् । संसदीय परम्परामा सभामुख, उपसभामुख बनेपछि पार्टीको पदीय जिम्मेवारीबाट राजीनामा दिने र पछि संसदीय जिम्मेवारीबाट पदमुक्त भएपछि पुनः पार्टीको जिम्मेवारीमा फर्कने प्रचलन छ ।

त्यसो त माओवादीको केन्द्रीय कमिटीमा कर्णाली प्रदेशकी उपसभामुख पुष्पा घर्ती विष्ट पनि छानिएकी छन् । अध्यक्ष प्रचण्डले उनको नाम पनि ‘पी घर्ती’ भनेर छोटकरीमा वाचन गरेका छन् । फर्जी नामबाट उपसभामुखहरुलाई पार्टीको केन्द्रीय कमिटीमा समावेश गर्ने यो नयाँ अभ्यास हो ।