प्रहरीबाटै जनताले सरकारको अनुहार हेर्छन : प्रचण्ड

काठमाडौं । पूर्वप्रधानमन्त्री एवम् नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले प्रहरी प्रशासन भनेको सरकारको अनुहार भएको बताएका छन्।

राज्य व्यवस्था तथा सुशासन समितिको बुधबारको बैठकमा बोल्दै उनले प्रहरी र शान्ति सुरक्षा एक अर्कामा जोडिने भन्दै जनताले सरकारको काम हेर्ने भन्दा सबैभन्दा पहिलो कुरा प्रहरी नै भएको जिकिर गरे ।

फिल्डमा तीता अनुभवहरू रहेकाले त्यसलाई रोक्ने उपायहरू सहित नेपाल प्रहरी सम्बन्धी कानुनलाई संशोधन गर्न बनेको विधेयक अघि बढाउनुपर्ने उनको भनाई रहेको छ ।

“लोकतन्त्रलाई सेवा प्रदान गर्ने कुरा नै हो। प्रहरीकै र शान्ति सुरक्षाकै कुरा गर्दा जनताले पहिलो हेर्ने सरकारको अनुहार प्रहरीबाटै हो। यो कुरा पनि आयो। हाम्रो त्यति राम्रो अनुभव छैन माथिल्लो लिडरसिप लेभलमा कुरा गर्दा त ठिकठिकै देखिन्छ त तल फिल्डमा जाँदाका अनुभवहरु धेरै तिता अनुभवहरू छन्। त्यसलाई रोक्ने के उपाय हुन सक्छ भनेर यसलाई परिमार्जन गर्नुपर्छ,” अध्यक्ष प्रचण्डले भने ।

उनले गणतन्त्रलाई सुधार गर्ने आधारका रूपमा बहसलाई अघि बढाउनुपर्ने बताए । समितिमा आज नेपाल प्रहरी सम्बन्धी कानुनलाई संशोधन गर्न बनेको विधेयकमाथि सैद्धान्तिक छलफल भएको हो।